نجلاء بدر : لم أتعرض للتحرش وهذا رأيي في المخرج خالد يوسف

كشفت الفنانة المصرية نجلاء بدر، رأيها في فكرة تعرض البنات للتحرش، مؤكدة أنها إذا تعرضت لهذا الأمر ستقوم بإبلاغ الشرطة.

وأشارت نجلاء بدر خلال تصريحات صحفية أنها لم تتعرض للتحرش يومًا ما، لكنها ستفكر في إبلاغ الشرطة لأن الزمان تغير، معلقة: زمان مكنتش ممكن أعمل كده بس دلوقتي ممكن أعملها لأن الزمن اتغير واختلف، أحنا زمان كنا بنخاف والواقعة كانت بالنسبالنا صدمة، وزمان مكنش في تحرش زي دلوقتي.

و أضافت: زمان لو كان حد يتطاول عليكي كانت بتبقى خضة وواقعة كبيرة أوي، والخضة بتخليكي مبتعرفيش تتصرفي النهاردة أنتي تقدري لو حد تطاول عليكي تطلعي تليفونك في ساعتها علشان تصوريه أنتي كده عندك دلائل، وبقى عندك صوت تقدري تقوليه.

وتابعت نجلاء بدر: أحنا كنا زمان بنخاف حتى بتخافي تقولي لأهلك إنك اتعرضتي لكده فأنا أعتقد إن الزمن اختلف والإثبات بقى أسهل يعني الأول مكنتيش بتعرفي تثبتي دلوقتي لأ، أصل أول حاجة ده اتحرش بيا، ودائما البنت هي اللي المقهورة وأحنا لسه مجتمع ذكوري، بس أنا شايفة إن دلوقتي بقى في منظمات ومواقف بتدافع عن ده فبقى في وسائل تقدري تعبري فيها عن ده وتخدي بيها حقك.

كما كشفت الفنانة نجلاء بدر كواليس تعاونها مع المخرج خالد يوسف في مسلسل سره الباتع، بموسم دراما رمضان 2023، مشيرةً إلى أنه واجه العديد من الصعوبات أثناء تصوير أول أعماله الدرامية.

واستكملت نجلاء بدر : الموضوع كان شاقا جدًا، لأن فيه لوكيشن الزمن القديم والمعاصر ولوكيشن ريفي وفلاحي وبيصور في رمضان ومعاه جيش من الممثلين وتفاصيل كتير في المسلسل، وبيكون موجود في اللوكيشن من الساعة 5 الصبح، وكان ممشينا زي الجيش.

وأضافت نجلاء: كان بيقود كل الناس بكل أدب واحترام، أنا افتكرت هيزعق أو هنتبهدل كلنا لكن محصلش كده، وفي مرة واحد من المجاميع بوظ المشهد وكان مشهد فيه تشجيرات قاله: ليه يابني.. مش حرام مجهود الناس نعيده تاني؟ ففضلت بتفرج عليه وبقول هو جاب الصبر ده منين، وعاتبه فقط ومشخطش فيه.

وأردفت نجلاء بدر: وفي مرة تانية زعق لحد دون ما يقصد عشان قطع مود نجمة كانت بتحضر نفسها للعياط وأول ما عيطت دخل عمل حاجة وبعد ما زعق فيه اعتذر له قدامنا كلنا وقاله: لازم تحس بالفنان أنا قاعد مستني الفنانة تعيط بقالها نص ساعة، فيه تفاصيل بصراحة مقدرش أنكرها وأبقى إنسانة قليلة الأصل والاحترافية لو مذكرتهاش.

أما عن رأيها في الانتقادات الموجهة المستمرة لخالد يوسف، تابعت نجلاء بدر: مين متهاجمش؟ أفلام المقاولات اتهاجمت وإيناس الدغيدي ويوسف شاهين اتهاجموا، كل واحد له مدرسته.

واختتمت نجلاء بدر حديثها عن خالد يوسف قائلةً: حبيت خالد يوسف أكتر في السينما، صعب عليّا في الدراما، كان بيجي شيك أوي ونضيف أوي وبيمشي متبهدل وشعره متنعكش وكله تراب.

آخر أعمال الفنانة نجلاء بدر دورها في مسلسل صوت وصورة، وحققت من خلاله نجاحًا كبيرًا، ودارت أحداث المسلسل حول رضوي والتي جسدت شخصيتها - حنان مطاوع- وهي متهمة بقتل الرجل الذي دمر حياتها وتحرش بها وفلتت من العقاب، وتتراكم عدد من الأدلة علها والفيديو الخاص لجريمة القتل ويتغير كل شيء بمساعدة الذكاء الاصطناعي.